La Lhiberdade Eirrumpe Sbolaciando Pulas Praças
Nascido em 1953, natural de Angueira, Vimioso, Portugal.
Naturalidade i eidentificaçon
Nun sei se 1953 tenerá sido anho de buona colheita. La berdade ye que, ne l die 15 de agosto desse anho, mie mai botou-me al mundo an Angueira, ũa poboaçon i fraguesie de l cunceilho de Bumioso i de l destrito de Bergáncia.
Uns dies apuis, registrórun-me i batizórun-me, ponendo-me l nome que questúman chamar-me: António Preto Torrão.
Studos i habilitaçones
Feita l’Anstruçon Purmária an Angueira, seguiu-se l Ansino Secundairo que fiç ne ls Seminairos de San Jesé de Binhais i Bergáncia (1971); de seguida, cumo trabalhador-studante, completei la licenciatura an Filosofie na Ounibersidade de l Porto (1977), l diploma studos supriores especializados an Admenistraçon Scolar na Scola Suprior d’Eiducaçon de l Anstituto Politécnico de l Porto (1991), l mestrado an Ciéncias de la Eiducaçon – specialidade de Filosofie de la Eiducaçon, na Ounibersidade de l Minho (2000) i la pós-graduaçon an Anspeçon de la Eiducaçon na Ounibersidade d’Abeiro (2001).
Atebidade Porfissional
Nel anho letibo de 1974/75, ampecei a ansinar ne l Liceu de Bergáncia. Porsor até final d’agosto de l anho 2000, pa lhá d’ansinar, stube a la frente de ls uorganos de admenistraçon i geston de bárias scolas.
Ourientei projetos de alunos de l DESE an Admenistraçon Scolar na Scola Suprior d’Eiducaçon de l Porto i, ne l ámbito de la Formaçon Cuntina de Porsores, açones de formaçon a porsores i diretores de Agrupamientos i Scolas.
Tenendo prestado probas públicas ne l respetibo cuncurso, fui selecionado cumo Anspetor d’Eiducaçon. An setembre de 2000, ampecei la nuoba carreira na Delegaçon Regional de l Norte de l’Anspeção-Geral d’Eiducaçon, adonde, selecionado tamien ne ls respetibos cuncursos, antre setembre de 2005 i junho de 2012, zampenhei cargos derigentes: chefe de Debison i diretor de Serbício Técnico-Anspetivo de l’Anspeçon-Geral d’Eiducaçon i d’Eiducaçon i Ciéncia.
Publicaçones
Sou outor i co-outor dalguns lhibricos i artigos noutras publicaçones subre Ourganizaçon i Admenistraçon Scolar i Eiducaçon.
Criaçon de l miu blogue
A 1 d’outubre de 2013, çpedindo l patron, decidi aposentar-me. Assi, nun podendo nin querendo star queto nin calhado, botei-me a fazer que fago. Assi, tengo aporbeitado l tiempo pa relhembrar i aperfondar l coincimiento i la scrita de la Lhéngua Mirandesa, que fui la mie purmeira lhéngua materna.
A partir de 13 de abril de 2017, tengo screbido i publicadoalguns testos – stórias i cuontas an Mirandés – subre pessonas i la giente d’Angueira i de la Tierra de Miranda ne l miu blogue www.Angueira.net, poboaçon adonde passei la mie anfáncia. Assi, até l die 31 de dezembre de 2022, ls cerca de 40 testos que publiquei neste blogue, ambora quaije todos eilhes stéian screbidos an Mirandés, alcançórun un total de 15 127 bejitantes de 68 países de ls cinco Cuntinentes i q’ls bírun 25 421 bezes.
Partecipaçon an mobimientos cíbicos
Zde final de ls anhos 60 de l seclo passado, abatiu-se subre l anterior, arriba de todo, subre l Nordeste Sramuntano, mas, specialmente, subre la Tierra de Miranda i, subremaneira, l cunceilho de Bumioso ua outéntica heicatombe demográfica que lhebou al ambelhecimiento de la populaçon residente, al definamiento i a la muorte lhenta de la maior parte de las poboaçones de l anterior de l Paíç, ou seia, de cerca de 2/3 de l território nacional.
- La Rede Atalaia
Hai ũa grabe amanaça a la persisténcia de las poboaçones de l munecípio de Bumioso. Propendo-se cumbaté-la i cuntrariá-la, fago parte la eiquipa que, a 6 de janeiro de 2018, fundou la Rede Atalaia, un mobimiento cíbico que angloba las 22 poboaçones de l munecípio de Bumioso. Ne l sentido de ancuntrar seluçon pa ls maiores porblemas qe las afétan i d’ajudar a rebitalizá-las, fui ancumbido de cordenar l trabalho de la eiquipa de administradores que redegiu l librico Concelho de Vimioso – o desafio da interioridade (Âncora Editora, Lisboa, 2018). Esta publicaçon cunten, na forma de porpuostas, ls cuntributos de bários aderentes a la Rede Atalaia i que ténen an bista ajudar a anfrentar, superar, ou, oumenos, a minorar, esses porblemas.
- L Movimento Cultural da Terra de Miranda
Pa lhá de la cuntinidade natural, territorial i ourográfica, hai tamien cuntinidade stórica, social, eiconómica, cultural i lhenguística antre Miranda de l Douro, Bumioso i Mogadouro, ls trés munecípios bezinos que fórman la Tierra de Miranda. Pa lhá de las afenidades, estes munecípios súfren tamien d’eidénticos porblemas. Assi, nun podie quedar andiferente al cumbite que, a meio de l anho 2020, me fui derigido, passei a partecipar nas reuniones i na redaçon de ls decumientos de l Movimento Cultural da Tierra de Miranda, ancluindo na rebison de l Plano Estratégico da Terra de Miranda que me ancumbírun de fazer.
- Cuncluson
La publicaçon de testos an Mirandés ne l miu blogue ye ũa seinha de l miu ampeinho an dar un cuntributo, indas que senzielho, para, juntamente cun outros outores mais sperientes, sabedores i eilustres, assegurar que, cuntinando a ser ansinada, falada i screbida, la Lhéngua Mirandesa nun se perda.
Ls testos i comentairos que tengo publicado nas páiginas de la Rede Atalaia i la colaboraçon na redaçon i na rebison de l Plano Estratégico da Terra de Miranda son outra seinha de l ampeinho an ajudar a cumbater i a cuntrariar ls eifeitos de l abandono i de la falha de ambestimiento a que, zde l seclo passado i até als dies d’hoije, ls bários Gobernos – ls de la Ditadura Nacional i, ancluindo mesmo, oumenos alguns de ls que se seguírun al 25 de Abril de 1974 – ténen benido a cundanar l anterior de l Paíç, arriba de todo l Nordeste Stramuntano, i, subremaneira, la Tierra de Miranda.
Assi i todo, hai que mantener la sprança i q’arrefucir las mangas i todo fazer para que, a bien de la justícia i mesmo de la defénsia de l território i de la giente de l Paíç, dũa beç por todas, las cousas demúden pa melhor. Ye que, cumo canta Sérgio Godinho, pa pior, yá bonda assi!
Stá nas nuossas manos i ye mais que tiempo de, an beç de cuntinarmos resignados, mos ounirmos i eisigirmos respuosta als zafios que la nuossa tierra anfrenta. Mais a mais, la Tierra de Miranda, las sues poboaçones i, arriba de todo, la sue giente, bien assi las sues Cultura i Lhéngua cada beç mais amanaçadas i an risco de zaparcer, percísan i merécen, pa lhá de l respeito, que les seia feita la justícia que, sendo-les debida, hai tiempo demais que les ye negada.
La lhiberdade Eirrumpe Sbolaciando Pulas Praças
Ningun páixaro nien naide se dá bien preso drento dũa gaiola. Pus fui assi que, a muitos Pertueses, les tocou a star i aguantar quaije cinquenta anhos ne l sou paíç. Claro stá que, s’algun die, quien alhá l metiu se squece de cerrar la puorta de la gaiola, quien stá lhá drento nun heisita: nun sfergante, bota-se fuora i scapa-se deilha, bate las alas i bola.
Onte, cumo hoije, las cousas nun se pássan de la mesma maneira cun todo mundo. La maior parte de las pessonas, q’anton stában cundanadas a ũa bida de miséria, íban aguantando i anganhando la fame cumo podien. Pa se lhibráren deilhas, nun les restraba outro remédio, senó, pegar na trouxa i ala: eimigrar, pagando al passador i fugindo a la guarda, botórun-se a salto para fuora de l paíç, a fazer pula bida noutros mais zambolbidos; ls moços, pa se çafáren de la tropa i d’ir pa la guerra quelonial, ponírun-se tamien eilhes a andar; inda outros, que querien mudar l regime, pa nun séren angaiolados, refugiórun-se noutros países, adonde se podie pensar, falar, screbir i andar lhibremente.
Ls que, assi i todo, cuntinórun a bibir ne l paíç, specialmente alguns figurones, que stában aquestumados a mandar i a falar d’arriba de la burra ou de la yeuga pa la giente mais probe i houmilde, apoiában la Ditadura; alguns remediados, que tanto se les daba que fusse esse ou outro l regime; i outros, nun fazendo óndias, íban aguantando la política outoritária. Mas, habie tamien outros que, pula calhada, clandestinamente, íban sembrando na tierra la semiente de la mudança: ourganizando-se, falando a la boca pequeinha, cunspirando i lhuitando contra la Ditadura. Muitos deilhes, nun cunseguindo scapar a la polícia política, fúrun caçados, encarcerados, torturados i até assassinados na prison. Claro stá que, acabada la II Grande Guerra i derrotados ls regimes de Mussolini na Eitália i d’Hitler na Almanha, cumbenie al regime de Salazar çfraçar, dando aires que Pertual serie un paíç lhibre. Anton, pa dar l’eideia que toleraba algũas bozes çcordantes i q’l criticában, iba fazendo eileiçones, que, lhibres, éran solo a fingir. Tenendo todo na mano, amanhában siempre maneira de ls candidatos de l regime séren declarados bencedores. Assi, indas que ganhando por muitos botos, nun habie modo de qualquiera candidato de la ouposiçon ser cunsiderado eileito.
Assi i todo, alguns de ls sous deputados mais nuobos, formando l’Ala Lhibaral, ampeçórun a çtanciar-se i a criticar l regime. I, cada beç menos cuntentos, arriba de todo, cula cuntinaçon i l camino que lhebaba la guerra quelonial, ls melitares, dando seinha de çcuntentamiento, ampeçórun a mobimentar-se. An márcio de 1974, houbo até ũa salida falhada de melitares dun quartel, que fúrun presos. Até que…
Die 25 d’Abril de 1974, purmanhana, passante un cachico de las uito, íban dous moços mirandeses – Rafael Alves, que ye de Picuote, miu amigo i cumpanheiro de studos habie quaije dieç anhos, i you, d’Angueira – mi apressados, a dar a la pierna a camino de la Faculdade de Filosofia da Universidade Católica de Braga, a ber se chegában inda a tiempo d’assistir a la purmeira liçon desse die. Cuido que, cerca dun més antes, Rafael cumpletara 21 anhos d’eidade i a mie faltában-me cerca de quatro meses pa ls cumpletar i quedar, assi, tamien you eimancipado. Andábamos ambos a dous ne l terceiro anho de l curso.
Un cachico mais de cien metros arriba de la República Pedro Hispano, qu’era na Avenida João XXI i adonde morábamos, apuis de passarmos la splanada de l Café Ragú, adonde questumábamos tomar café, Linda, ampregada de l Supermercado Mabal, diç-mos q’algo d’anormal se staba a passar an Lisboua. Mas nun dando amportáncia al q’oubimos, seguimos palantre. Yá na Rua Eng.º Arantes e Oliveira, que de l Liceu Dona Maria II i sendo-le perpendicular, dá pa la Avenida Marechal Gomes da Costa, a meio i antre las squinas de la “casa de ls magistrados” i de l Café Rosil, oubimos ũa boç a chamar por nós. Era António Fidalgo, un cumpanheiro de studos, indas que mais bielho i adelantrado que nós, pus era yá finalista, que, de l passeio de l outro lhado de la rue, mesmo a la frente de la Livraria Vítor, cun aire todo radiante, ampeça tamien a acenar-mos i, cun dous dedos de la mano dreita – l andicador i l maior – alhebantados i a formar un “V”, grita para nós: “Viva a Revolução!”
Spantados, preguntemos-le, i el dixo-mos, l que s’habie passado nessa madrugada i l qu’inda se staba a passar an Lisboua i ne ls quarteles de la tropa de l restro de l paíç. Claro que yá nien fumos pa la Ounibersidade… Biremos i tornemos para casa pa cuontar als outros cumpanheiros qu’inda alhá stában i nun sabien de nada. Anton, todos antusiamados i al redor de la telbison, passemos quaije toda la manhana a ber l que se staba a passar na capital. Custaba-mos mesmo a acreditar que, finalmente, la Reboluçon habie chegado a Pertual. Quedemos, aton, a saber que…
Hai madrugadas i madrugradas, Hai tamien ouroras i ouroras… Hai madrugadas i ouroras tristes, Hai outras alegres i lhibertadoras.
Ampeçando a rumper i a clarear cedo l die, La madrugada bai cedendo lhugar a l’ourora… I, ne l cielo, alhá de ls lados de naciente, L Sol ampeça a raiar cun outro splandor.
I, da meio de la lhinha d’hourizonte, Bai almeando la paisaige toda al redor. Einundando la manhana cun tal fulgor, Ampunta la scuridon i spanta l miedo.
Arramando cada beç mais lhuç, Bai pintando todo i tingindo l cielo Cun tintas de mi bariadas quelores: Claras, mais alegres i mais bibas…
Campante que nien l paixarico mais feliç, Q’abista un bando qu’eilhi anda a la buolta, Scapando-se de l nial, ansaia l purmeiro bolo, I, ajuntando-se a el, bota-se a bolar a la suolta.
L’abenida adonde bai a dar la rue an que soubimos de la Reboluçon tenien ũa i outra nomes de pessonas amportantes de l regime: l Marechal Gomes da Costa, de mala mimória i reputaçon outoritária, tenie xefiado l mobimiento melitar de 28 de maio de 1926, que, partindo de Braga i marchando até Lisboua, acupou la capital. L cabecilha de ls melitares rebuoltosos nomeia-se Persidente a el mesmo. Indas que, passado un més, tenga sido feito prisioneiro i sustituído por Carmona, abriu las puortas a la Ditadura; l Eng.º Arantes e Oliveira, pa lhá de menistro de las Obras Públicas de Salazar, fui tamien Gobernador-Geral de Moçambique i zampenhou inda outros amportantes cargos. Na rue cul sou nome, quedaba tamien la Livraria Víctor, pertença dun porsor que, por ser de la Ouposiçon Democrática, Salazar ampediu d’ansinar. Apuis de las Puortas q’Abril Abriu, que tan bien declamaba Ary dos Santos, ye q’l porsor Víctor de Sá tornarie a ansinar, mas na ounibersidade. Nun admira que, a seguir, téngan mudado l nome a essas rue i abenida, passando a tener l q’hoije ténen, i, spero you, que perdure i le manténgan para siempre: Rua 25 de Abril i Avenida da Liberdade.
Apuis dalgũas ancertezas de la manhana, quedemos a saber de la rendiçon de l xefe de l Goberno i, assi, de l triunfo de la Reboluçon. Seguiu-se, anton, ũa tarde de mi grande cuntentamiento i antusiasmo i de comemoraçon nas rues i praças de Braga pula bitória de las Fuorças Armadas apoiados pul pobo pertués.
Arrebentando algemas, grilhetas, cadenas I las grades q’aprisionában l pensamiento, Abrindo camino a la sprança, torna-se a acalentar L suonho de melhores dies q’han de benir.
Dúzias, cientos i cientos, milhentas pessonas Ampéçan a salir de casa pa las rues i abenidas, I, caminando delgeiras, agarradas ũas a las outras… De rumpante, un mar de giente fai anchir las praças.
De ls punhos cerrados i de las manos de la multidon, Florece i abre-se un stendal de crabos burmeilhos. De boç afinada, canta la “Grándola Bila Morena…”, I, antusiasmada, fai deilha l’hino de la Reboluçon.
Marcan-se traços de bida nas nuobas alamedas, Ábren-se rotas q’anuncían l feturo por benir… Dando suonho a la bida i bida al suonho, al suonho dũa bida, La lhiberdade eirrumpe sbolaciando pulas praças.
I, de crabos burmeihos a florescer ne l aire, La multidon, toda alboroçada i animada, An arrebatimiento supremo, solta an coro la boç: Bíban las Fuorças Armadas! Biba la Reboluçon!
Apuis de la cena i até las purmeiras horas de soutordie, fui ũa nuite de muita animaçon até que, mi cansado, l cuorpo yá só pedie cama. A drumir que nien ũa piedra, ampeço a tener un suonho qu’era a ber la mie bida a andar de la frente para trás. Apuis de se rebobinar cumo ũa fita de cinema, l suonho era quaije malo: la bida era a passar de garoto a moço.
Na mie bida de garotico, ampecei a ber que la maior parte de las casas éran de piedra i teilha suoltas, scuras, mas mui arejadas i frescas, arriba de todo ne l eimbierno. Auga canalizada i retrete nien na scola las habie i na maior parte de las casas de bibir quien las biu? Assi, la lhimpeza i la heigiene nun podien ser grande cousa. A nun ser l barbeiro que serbie tamien d’anfermeiro, cuidados de salude an cundiçones nun les habie i ls q’habie éran loinje, na Bila, i mi caros. Assi, tornei a ber ls anjicos, tantos ninos i ninas d’Angueira que se morrien i lhebábamos nun caixonico branco pa l semitério. Mas, nun éran solo ninos, éran tamien alguns moços i moças, ties i homes, qu’inda nuobos, tamien se morrien antes de tiempo. Por bias disso, ls filhos dalguns deilhes quedában órfanos i solo al cuidado de sue mai ou de sou pai, cunsante qual deilhes quedasse biúdo: sendo la mai, tocaba-le tener que passar a fazer tamien de pai; se fusse l pai, que remédio tenie el, senó, fazer tamien de mai.
De seguida, sonhando qu’era yá un cachico mais crecidico i q’andaba a la scola, tornei a ber alguns cumpanheiros de ls menos dados pa la letra i que les custaba un cachico mais a antender las matérias ou inda outros que tenien queda i les daba pa l’asneira. Cuitados! La porsora nun se cansaba de spetá-les ũas lambadas i stalhadas na cara, dá-les uns puxones d’oureilhas, arrepelar algũas mocicas, dá-les cula tiesta ne l quadro, baradas na cabeça ou bordoadas nas cuostas de ls mocicos mais bielhos i zanquietos. Quaije parcie ser la maneira de, seguindo ũa cartilha antiga i bien coincida, la porsora – qu’era mala que nien las queluobras – “sacudir l puolo” de la camisola ou de la jaqueta de ls garotos. Ou cuidarie pori eilha, q’assi, a la fuorça, serie capaç de les meter las matérias na cabeça. S’ls garotos questumában lhebar stalhalhadas i algũas garotas arrepelones, duns puxones d’oureilhas i dũas réugadas na mano, mi ralos éran ls duns i doutros que se çafában. Bá lá que, oumenos assi, alguns garotos mais zanquietos yá nun tenien que passar un cacho de tiempo, al friu i a las scuras, ne l puron. Inda para mais, i bien çfrente de l q’hoije acuntece, se la porsora se queixasse a la mai pul sou filho ser mi falador i çtraído ou se portar mal na sala, l garoto nun se çafaba de, a camino ou an casa, lhebar un raçpanete, ou mesmo ũa tareia, de la mai. Mas, inda pior, era quando eilha cuontaba al pai l que le dixo la porsora de l garoto. Ye que s’assujeitaba a lhebar ũa túndia de sou pai. La mai i l pai cumpletában, assi, las “fiestas” que la porsora l’ampeçara a fazer na scola.
Cun “mimos” destes, quien ye que nun serie feliç, capaç daprender bien i de gustar d’andar a la scola?!
Para mais, mesmo ne ls dies an q’habie scola, poucos éran ls pais que dában algun çcanso als sous garotos. Ye que, apuis de la scola, inda ls mandában a cuidar de la cria – bacas, mulas ou burros –, andar cul ganado, regar i scabar algũa huorta, ir a las nabiças ou a segar uns feixes de ferranha ou de cebada ou anchir um par d’alforjas de nabos i d’yerba pa cebar ls cochinos i aquemodar la cria, arramar strumo ou andar a la frente de la junta de bacas ou de la pareilha de béstias que stában a puxar l arado ou la charrua, a arar algũa lhata ou cortina.
Passando an rebista, l que tocaba a las mociças i als moços fazer apuis de cumpletáren la quarta classe, tornei a ber que la maior parte deilhas i deilhes nun cuntinórun studos – mi ralos éran ls pais que podien çpensá-los de l trabalho i, inda porriba, pagar la çpesa de mandá-los pa la cidade pa cuntinar a studar – ampeçában lhougo a trabalhar, cumo giente grande i qualquiera adulto: lhabrar, scabar, strumar, arrastrar, zmontar, segar a la gadanha, cargar i arreculhir l feno, cuidar de la cria, segar trigo i centeno na segada, acarrear, trilhar i andar a la palha i a arreculhi-la ne l palheiro. Assi, quaije nien les restraba tiempo p’apanhar bícios.
Bonda lhembrar ls trabalhos que las mocicas i ls mocicos tenien que fazer, pa quedarmos c’ũa eideia de l que les tocarie a las moças i als moços fazer. Las moças tenien inda que tratar de la bida de casa – cozinar, lhabar i tratar de la lhouça i de la roupa –, trepar puls uolmos pa les ripar la fuolha, tratar de la quemida de ls cochinos i de las pitas i dar ũa mano a sous pais i armanos a cuidar de la cria, a regar, scabar i tratar de las huortas. De berano, inda lhes tocaba segar, birar, cargar, trilhar i arrecadar l feno i la palha ne l palheiro.
Agora que quedestes a saber cumo, antes de l 25 d’Abril de 1974, era la bida de ls garotos, de ls moços i de ls homes i las ties d’Angueira i de las poboaçones de la Tierra de Miranda, cumoquiera preguntareis bós: “Aton, era solo trabalho l qu’eilhes fazien? I de antretenimientos i dibertimientos, nada? Cumo era? Nun tenien dreito a niun?”
Claro que si!… Las garoticas i mociças a fazer de casa, a jogar la macaca i a las necras; ls garoticos i mocicos a jogar la cunca, la raiola i a las cerilhas, a fazer corridas i a saltar la mula. Las moças i ls moços, pa lhá de jogáren a la cabra-ciega, al cántaro, al anel i al sconde-sconde, nadáren na ribeira, an sítios i horas çfrentes – eilhas a la nuitica i eilhes pul die –, nas tardes de deimingo ou nas fiestas, oubir ls tocadores i bailar un cachico; íren a las feiras i als arraiales de las fiestas de poboaçones bezinas; ne l final de las tardes de la primabera i de l berano, aporbeitában pa se ber i namoriscar un cachico al redor de la fuonte de l Pilo. Doutras maneiras de namorar, arriba de todo pul termo, dalgũas i dalguns cumoquiera será melhor quedar calhado ou çcuitar l que las abrigadas, las touças i ls palheiros poderan i quérgan dezir. Pul final de tarde i an algũas nuites de primabera i de l berano, ls moços, pa lhá de se botáren a jogar las cartas – al chincalhon ou a la sueca – na taberna i a la barra ne l Lhargo de Sante Cristo ou ne l de l Ronso, inda les sobraba tiempo pa s’ajuntáren porriba de l paredon de ls huortos de riba de l Pilo, pa béren las moças qu’íban a la fuonte, pa dáren a la treta i pa cumbináren i armáren algũas lhafrauzadas. De las sues, fazíen inda, d’eimbierno, na Machorra i na Pandorcada i, arriba de todo, ne l Antruido, quando s’ancarochában i íban a las casas adonde habie moças; i, de berano, quando, a la nuite, íban a spreitar las moças a nadar i les scundien la roupa nas marges de la ribeira i inda quando se botában a tirar las balancies i ls melones uns als outros nas sues huortas.
Claro stá q’anquanto ls homes íban a jogar a las cartas i a buer uns copos culs amigos na taberna i alguns deilhes a jogar a la barra, a las ties tocaba-les, quando muito, dar a la lhéngua antre eilhas subre las bezinas, l porte i ls namoricos de las moças, mas, arriba de todo, filar uns manelos de lhana ou de lhino i de fazer meia.
Pul final de madrugada, inda sonhei cul tiu Miguel Galharito, l home de la tie Marie Rosa Galharita, ũa de las cuntrabandistas d’Angueira. Assi, tornei a ber cumo eilha era i ganhaba la bida: a lhebar fardos de cuntrabando, a las cuostas i de nuite, até Alcanhiças i desta bila raiana spanhola para Angueira. Tornei tamien a ber l tiu Miguel, moreno, cun uolho ciego i sou bigote i de cigarrico “mata-ratos” apagado al canto de la boca, fazendo pula bida cul sou trabalho de trolha i a lhabrar, c’ũa pareilha de burros, a scabar i a cuidar de las sues huorticas de la Cabanhona i de la Yedra. De poucas posses i propiadades, pa lhá de las dues huorticas i cumoquiera inda mais ũas poucas terricas, la casa adonde ambos a dous, cun sous filhos – Manuel Negro i sues armanas, antes destes salíren de casa i d’Angueira pul mundo –, bibien, i ũa pareilha de burros, de sou, pouco mais tenien. Cumo se questuma dezir, ser probe nun ye defeito nien quier dezir que nun se tenga la cabeça ne l lhugar debido i nun se saba pensar. Pus tiu Miguel, nacido an Bumioso – ou na Bila cumo la giente le questumaba chamar – i casado c’ũa tie i morando an Angueira, era un de ls poucos moradores q’amostraba tener cuncéncia política. Lhembra-me d’ũa beç, que l’oubi a falar de la situaçon de l paíç naquel tiempo, el dezir: “O pobo stá sempre a drumir, a República sempre a falar e o Salazar já é beilho e stá sempre a mamar!”
Nien calculais la pena que me dou al saber que tiu Miguel Galharito se tenie morrido cerca dun més antes de L die einicial anteiro i lhimpo – cantado por Sophia de Mello Breyner Andresen (O Nome das Coisas, 1974) – chegar, ou seia, un cachico antes de l 25 d’Abril de 1974 se dar. Assi, nien sequiera puodo, oumenos, saber de la Reboluçon.
Biba l 25 d’Abril!
25 d’Abril Siempre!
Braga, 10 d’abril de 2023
Se tubirdes gana i quejirdes saber cumo, antes de l 25 d’Abril, se passában algũas cousas de la bida (ũa trilha, ũa feira… i stórias) de las pessonas d’Angueira, eiqui quédan alguns links que dan acesso a testos de l blogue www.Angueira.net i que bos cumbido a, se tubirdes subreciente pacéncia pa m’aturar, ler:
https://angueira.net/2016/07/24/storia-de-la-compra-de-lalbardin
https://www.angueira.net/2016/06/20/storia-de-l-pastor-i-de-l-margulho-de-las-mocas-an-la-ribeira
https://www.angueira.net/2016/10/02/cumbersa-de-l-tiu-galharito-cul-tiu-almonico
https://angueira.net/2016/11/11/las-peripecias-de-l-burro-de-l-tiu-adriano
https://www.angueira.net/2021/12/12/las-armanas-marreiras-i-las-maneiras-dansinar-dantigamente
https://angueira.net/2017/04/09/cousas-de-la-mocidade-pegar-l-namorado-i-faze-lo-pagar-l-bino
https://angueira.net/2019/02/01/la-machorra-la-pandorcada-i-l-antruido-an-angueira
